नेपालगञ्ज । ब्रिज इन्टरनेशनलका विद्यार्थीहरूले आफ्नो नियमित खाजा खर्चबाट केही रकम बचत गरी नीलसागर सेवा आश्रममा खाद्यान्न तथा आवश्यक सामग्री सहयोग गरेका छन । विद्यार्थीहरूले आफ्नै व्यक्तिगत खर्च कटाएर सामाजिक सेवामा योगदान गर्ने उद्देश्यसहित आश्रम पुगेर त्यहाँ रहेका ज्येष्ठ नागरिक तथा असहाय व्यक्तिहरूलाई सहयोग गरेका हुन ।
विद्यार्थीहरूले आश्रमका लागि आवश्यक खाद्यान्न तथा दैनिक उपभोगमा प्रयोग हुने सामग्री उपलब्ध गराएका थिए । सहयोग सामग्री हस्तान्तरणसँगै उनीहरूले आश्रममा रहेका ज्येष्ठ नागरिक तथा असहाय व्यक्तिहरूसँग केही समय बिताउँदै उनीहरूको अवस्था, जीवन भोगाइ र संघर्षका कथासमेत सुने ।
आश्रममा रहेका वृद्धवृद्धाहरूले आफ्नो जीवनका विभिन्न उतारचढाव, पारिवारिक अवस्था, दुःख–पीडा तथा संघर्षका अनुभव सुनाउँदा विद्यार्थीहरू भावुक बनेका थिए। कतिपय ज्येष्ठ नागरिकले आफूले जीवनमा भोगेका कठिनाइ र अहिले आश्रममा बिताइरहेको दैनिकीबारे विद्यार्थीहरूसँग अनुभव साटेका थिए । उनीहरूको कुरा सुनेपछि विद्यार्थीहरूले ज्येष्ठ नागरिकप्रति सम्मान, माया र सहयोगको भावना अझ गहिरो भएको बताएका छन ।
विद्यालयका अनुसार विद्यार्थीहरूलाई पढाइसँगै सामाजिक उत्तरदायित्व, मानवीय संवेदना र सेवाभावको विकास गराउने उद्देश्यले यस्तो कार्यक्रम गरिएको हो । समाजमा रहेका कमजोर, असहाय तथा सहयोगको आवश्यकता भएका व्यक्तिहरूप्रति युवापुस्ताले आफ्नो जिम्मेवारी महसुस गर्नुपर्ने सन्देश दिन पनि कार्यक्रमले महत्वपूर्ण भूमिका खेलेको विद्यालयको भनाइ छ ।
विद्यार्थीहरूले आफ्नो दैनिक जीवनमा हुने सानो–सानो खर्च व्यवस्थापन गरेर पनि सामाजिक सेवाका लागि योगदान गर्न सकिने बताएका छन । उनीहरूका अनुसार खाजा, मनोरञ्जन वा अन्य अनावश्यक खर्चबाट थोरै रकम बचत गर्ने हो भने त्यसले आवश्यकतामा रहेका व्यक्तिका लागि ठूलो सहयोग बन्न सक्छ ।
सहयोग कार्यक्रममा सहभागी विद्यार्थीहरूले नीलसागर सेवा आश्रममा आएर ज्येष्ठ नागरिकहरूसँग प्रत्यक्ष भेटघाट गर्न पाउँदा आफूहरूले पुस्तकमा पढेको भन्दा फरक किसिमको जीवन अनुभव प्राप्त गरेको बताए । उनीहरूले ज्येष्ठ नागरिकका कथा र अनुभवले जीवनप्रतिको दृष्टिकोणलाई अझ फराकिलो बनाएको उल्लेख गरे ।
विद्यार्थीहरूको यस पहलले ‘सानो बचत, ठूलो सहयोग’ भन्ने भावनालाई व्यवहारमै उतारेको छ । आफ्नो व्यक्तिगत खर्चबाट रकम बचाएर सामाजिक सेवामा प्रयोग गर्ने विद्यार्थीहरूको प्रयासले समाजमा सकारात्मक सन्देशसमेत प्रवाह गरेको छ ।
विद्यालयले आगामी दिनमा पनि विद्यार्थीहरूलाई सामाजिक सेवा, मानवीय सहयोग र समुदायसँग जोडिने विभिन्न गतिविधिमा सहभागी गराउँदै लैजाने जनाएको छ । विद्यार्थीहरूको यस्तो पहलले शिक्षाको उद्देश्य केवल कक्षाकोठामा सीमित नभई समाज र समुदायप्रतिको जिम्मेवारीबोध विकास गर्नु पनि हो भन्ने सन्देश दिएको छ ।
