२०८३ आश्विन २३, शुक्रबार
असोज१७,२०८३ लहान । सिरहाको औरही गाउँपालिका–१ दरैयाबाट सशस्त्र प्रहरीले ११० किलो ७६० ग्राम प्रतिबन्धित लागुऔषध गाँजासहित तीन जनालाई नियन्त्रणमा लिएको छ।
विशेष सूचनाका आधारमा सशस्त्र प्रहरी बल नेपाल नं. ७ गण हेडक्वार्टर सिरहाबाट खटिएको १५ जनाको टोलीले शुक्रबार राति करिब १ः३५ बजे भारततर्फ लैजाँदै गरेको अवस्थामा गाँजासहित तीन जनालाई नियन्त्रणमा लिएको हो।
सशस्त्र प्रहरी नं. ७ गणका प्रमुख सुमनजंग थापाका अनुसार नेपालबाट टाउकोमा बोकेर भारततर्फ लैजाँदै गरेको अवस्थामा उनीहरूलाई ६ बोरा गाँजासहित पक्राउ गरिएको हो। नियन्त्रणमा लिएपछि गण हेडक्वार्टरमा ल्याएर नापतौल गर्दा ११०.७६० किलो गाँजा बरामद भएको थापाले जानकारी दिए।
पक्राउ पर्नेमा औरही गाउँपालिका–२ देउरीपट्टीका मनाई सदायका छोरा अन्दाजी ४३ वर्षीय मिश्रिलाल सदाय, सोही स्थानका प्रेमा सदायका छोरा अन्दाजी ३१ वर्षीय मनिकलाल सदाय र धनगढीमाई नगरपालिका–५ का रामप्रकाश यादवका छोरा अन्दाजी ३३ वर्षीय श्यामसुन्दर यादव रहेका छन्।
प्रहरीले उनीहरूको साथबाट तीन थान मोबाइल फोनसमेत बरामद गरेको जनाएको छ। पक्राउ परेकामाथि आवश्यक अनुसन्धान तथा कानुनी प्रक्रिया अघि बढाइएको छ।
स्रोत सत्यपथ खबर
प्रतिक्रिया प्रकाशनअघि हाम्रो सम्पादकीय टोलीले समीक्षा गर्नेछ। तपाईंको इमेल सार्वजनिक गरिने छैन।
